Prago estas unu el la plej belaj urboj en la mondo.

Sabate mi legos ion interesan, aŭ mi iros en arbaron.

Kvankam mi longe igis lin prepariĝi al la ekzameno, li tamen ne sukcesis.

Nek Maria nek Petro legis la libron.

Mirek studos Esperanton, se li havigos por si bonan lernolibron.

La instruisto klarigis ĉiujn novajn vortojn, por ke ĉiuj kursanoj bone sciu ilin.

Estas necese, ke vi ĉiutage studu.

Mi eklernos nur venontsemajne.

Prefere ne prokrastu tion kaj komencu.

* * *

Estimata amiko,

mi salutas vin kore kaj esprimas sincerajn dankojn por via letero de la pasinta monato kaj por ĉio, kion vi enmetis en la leteron. Precipe la bildkartoj pri vidindaĵoj el via ĉirkaŭaĵo tre plaĉis al mi. Hodiaŭ mi sendas al vi per la sama poŝto ankaŭ kelkajn presaĵojn pri nia lando.

Nun mi respondos viajn demandojn. Viajn proponojn pri nia ekskurso­plano mi konsentas. Krome mi rekomendas al vi viziti ankaŭ la kastelon Konopiště, kiu situas ne malproksime de Prago. Vi mencias la sudan Bohemion, kiun vi pasintjare nur mallonge vizitis. Vi pravas, ke ĝi meritas pli intiman konatiĝon. La densaj arbaroj kaj la trankvilaj fiŝlagoj efikas vere trankvilige. Ankaŭ la kuracloko Třeboň estas vizitinda.

Ankaŭ ion pri mi. Nur antaŭ nelonge mi akceptis novan okupon. Mia nuna laborloko estas pli proksima al mia loĝloko, tial restas al mi ankaŭ pli multe da tempo por miaj hobioj. Mi ne elĉerpis pasintjare la tutan libertempon, tial mi havos en ĉi-jara somero pli da liberaj tagoj.

Mi sendas al vi sincerajn salutojn ankaŭ nome de mia edzino kaj baldaŭ

ĝis revido via Antonín